பூக்குட்டியின் ரகசியம்

படம் : இணையத்திலிருந்து

சாமிகிட்ட போன அப்பா குறித்து

பூக்குட்டியிடம்

அவர்களும் சொல்லவில்லை

அவளும் கேட்கவில்லை

அழுது புரண்டு

பேசியோய்ந்த உறவுகள்

அவரவர் கூடு நோக்கி

பறந்தாகிவிட்டது

க்ளாஸ் டீச்சரும்

மேத்ஸ் டீச்சரும்

அவ்வப்போது

பூக்குட்டியின்

தலை வருடிப்போகிறார்கள்

பகற்பொழுதுகளில்

காய்ந்த தடங்களை

கன்னங்களில் சுமக்கும் அம்மா

இரவுகளில் இடைவிடாது

நீர் வார்க்கிறாள்

போர்த்திவிடும் அப்பாவின்

விரல்களில் வழிந்த

பிரியத்தின் சாயம்

நிறமிழந்து கொண்டிருக்கிறது

அப்பா வாங்கிவரும்

அதே பெரிய சாக்லெட் மட்டும்

பூக்குட்டியின்

ஹோம்வொர்க் மேசை மேல்

தவறாமல் காத்திருக்கின்றது

புறங்கையில் ஓவியமொன்றைத்

தீட்டியபடி வழிந்தோடும்

சாக்லெட் வழிசலை

இதழ்கள் பதித்து உறிஞ்சுகையில்

துளிர்க்கும் கண்ணீரை

யாருமறியாமல்

அப்பா துடைத்துவிடுவதை

ரகசியமாகவே

வைத்திருக்கிறாள் பூக்குட்டி!

-