தீப்பற்றும் பொழுதுகள்

உறவுகள் கூடி குதூகலிக்கும்

ஊர்ப் பண்டிகைப் பொழுதுகளில்

ஒருவரையொருவர் கடக்க

பட்டும்படாத உரசல் மின்னல்கள்...

மொட்டைமாடி கைப்பிடிச் சுவரோரம்

மொத்த சொந்தமும் ஊர்க்கதை பேச

எதேச்சைபோல் நளினமான நகர்த்தலில்

விரல்களுக்கிடையே வெட்டும் மின்னல்கள்...

இதற்குமேல் இடமில்லையென

பாதிப் பந்தியில் பசியார்ந்து போக

’இன்னும் கொஞ்சம்’ என என் இயலாமைப்

பார்வையை தின்னும் விழியசைப்புகள்...

நெருங்கிய கடற்கரை நடைகளில்

தீண்டிப் பின் மணல் திருடும் அலையில்

பாதத்தின் கீழ் வந்த பள்ளத்தில் தடுமாற

பட்டென இறுக்கமாய் தோள்பற்றும் கைகள்...

-------------------------