ஆயிரமாயிரம் ஏப்பிஸ்களின் அன்பு முத்தத்தில்




வலியிருக்கிறதா
எனக்கேட்கிறார்கள்
இருக்கிறதெனப்
பதிலுரைக்கிறான்
எப்படி வலிக்கிறதென
வினவுகிறார்கள்
சொல்லத் தெரியவில்லை
ஆனால் கடுமையென்கிறான்
சொன்னால்தானே புரியுமென
நெருக்கடிக்கிறார்கள்

வலி மின்னும் பகுதி
ஒரு கனத்த தேன்கூடு போன்றும்
அடை மொய்க்கும்
ஆயிரமாயிரம்
தேனீக்களின் தீண்டலாய் வலி
மின்னுகிறதென்கிறான்.

உடனடியாக பேச்சு
தேனீக்கள் குறித்தும்
அதன் மருத்துவ குணம் குறித்தும்
தேனின் தரம் குறித்தும் தாவுகிறது.
ஒருவன்
தேனீக்களின் உயிரியல் பெயர்
என்னவெனக் கேட்டிருக்கிறான்
அவனும் இணைந்து
யோசித்துக்கொண்டிருக்கிறான்.

No comments: